قصيدة (( الشُهرة2010 )) إهداء خاص الى عراق السلام :: ضرغام العراقي

قصيدة (( الشُهرة2010 )) إهداء خاص الى عراق السلام :: ضرغام العراقي

(( الشُهرة))

ليس ان تراني كل يوم ولكن ان تذكرني في غيابي!!!...

ما محتاج واطلع عالفضائيات
لأن عندي الشعر مو هذه مقياسة

ولا محتاج يوم اتملق الانسان
واذا كاسة فرغ أملي اله كاسة

انه شاعر وطن تحتاجة كل الناس
مثل حال الوطن يحتاج كل ناسة

وانه شاعر قضية اتعيش بالوجدان
والتاريخ يذكر اسمي كراسة

وتره الشاعر نبي لكنة ما معصوم
بس فكره ال (مُحمد) يحمل براسة

وتره الشاعر (غَني) لكن فقير هواي
ويملك بس قلم والورقة واحساسة

وكلهة تعتزل لاعب واذا فنان
بس الشاعر الما يعلن افلاسة

وكلهة تروح بس الاصلح اليبقون
ومعروف الصدگ لو هبت انفاسة

ومابيهة فخر تبني تفلش ابيوت
ابزود الخشب من تحچي الفاسة

والمرّه شتة ماينخة وين فلان
بثيابه انتخة يوم البرد جاسة

واذا ساسك رمل لا تبني فوگة قصور
اليبني من صدگ وسط الگلب ساسة

واذا عندك نقص لتصير فاعل خير
بيك المشكلة ما حاجة الدراسة

ولتجامل بشر من عندة ليش اتخاف
الشاعر كالمَلك جمهورة حراسة

وماأهتم الك ثق واعتقد بالله
ولامره صرت في بالي وهواسة

لأن اتخيلك واحد مثل ذولاك
گاعد عالرصيف وبيده حط طاسة

ومن حبني صدگ يندل تره الخدين
مو مثلك لأن ياهو الأجة وباسة... وللحديث بقية